Nilalayon ng pananaliksik na ito na tukuyin ang sosyo-demograpikong katangian ng mga mag-aaral sa ikasampung baitang ng Sulu National High School at ang lawak ng paggamit nila ng modernong teknolohiya sa pag-aaral ng Filipino. Gumamit ito ng deskriptibong kwantitatibong disenyo at survey sa 100 kalahok na pinili sa pamamagitan ng purposive sampling. Ipinakita ng resulta na karamihan ay edad 16–17, mas madalas gumagamit ng cellphone at kompyuter, at kakaunti ang gumagamit ng tablet. Natukoy rin na walang makabuluhang pagkakaiba sa paggamit ng teknolohiya batay sa demograpikong propayl, ngunit may mataas na kaugnayan ito sa pag-aaral ng Filipino.